இவ்வருடம் நிலவிய கடும் வெப்பம் பிரான்சின் தேன் உற்பத்தியை பெருமளவில் பாதிப்படைய செய்துள்ளது. 

 

ஜூன் மற்றும் ஜூலை மாதத்தில் நிலவிய கடும் வெப்பம் காரணமாக 1,500 பேர் உயிரிழந்திருந்தாக முன்னர் தெரிவித்திருந்தனர். இந்நிலையில், இக்கடும் வெப்பம் பல்வேறு தொழில்களையும் பாதித்துள்ளது. அதில் ஒன்று தேனீக்கள். Hérault மற்றும் Gard நகரில் 46°c வெப்பம் நிலவியிருந்தது. இந்நிலையில் அங்கு 80 வரையான பெரிய தேன் கூடுகள் மொத்தமாக அழிவடைந்ததாகவும், ஒவ்வொரு தேன் கூட்டிலும் 40,000 தொடக்கம் 60,000 வரை தேனீக்கள் இருந்ததாகவும் அவை அனைத்தும் அழிவடைந்துள்ளதாகவும் தெரிவிக்கப்பட்டுள்ளது. 

 

34°c தொடக்கம் 36°c வரையான வெப்பம் மாத்திரமே தாங்கக்கூடிய தேனீக்கள் இந்த அளவான (46°c) வெப்பத்தை தாங்குவது சாத்தியமே இல்லாதது என தேனீ வளர்ப்பாளர்கள் தெரிவித்துள்ளனர். இதனால் இம்முறை தேன் உற்பத்தி பெருமளவில் பாதிக்கப்பட்டுள்ளதாகவும், தட்டுப்பாடு நிலவும் எனவும் தெரிவிக்கப்பட்டுள்ளது.