ஆப்கானிஸ்தானில் கன மழை...! வெள்ளத்தில் சிக்கிய 370 பேர் பலி....
![ஆப்கானிஸ்தானில் கன மழை...! வெள்ளத்தில் சிக்கிய 370 பேர் பலி....](ptmin/uploads/news/World_renu_afghanista flood.jpeg)
19 வைகாசி 2024 ஞாயிறு 15:49 | பார்வைகள் : 2239
மூன்று வாரங்களாக ஆப்கானிஸ்தானில் பெய்து வரும் கனமழையால் 370க்கும் மேற்பட்டோர் உயிரிழந்துள்ளதாக கூறப்படுகிறது.
1600 பேர் காயமடைந்துள்ளனர்.
தாலிபான் அதிகாரிகளின் கூற்றுப்படி, கோர் மாகாணத்தில் அதிக சேதம் ஏற்பட்டுள்ளது.
இங்கு சனிக்கிழமை மே 18 ஆம் திகதி வெள்ளத்தில் சிக்கி 60 பேர் உயிரிழந்தனர்.
நிலைமையின் தீவிரத்தை கண்ட தலிபான் அரசு மக்களுக்கு உதவ விமானப்படையை அனுப்பியுள்ளது.
தாலிபான் செய்தி தொடர்பாளர் மவ்லவி அப்துல் வெளியிட்ட தகவல்களின்படி, அப்பகுதியில் இன்னும் பலர் காணவில்லை. மோசமான வானிலை காரணமாக, காயமடைந்தவர்களுக்கு உதவி செய்வதில் மீட்புக் குழுவினர் மிகவும் சிரமப்படுகின்றனர்.
ஆப்கானிஸ்தானில் படக்ஷான், கோர், பாக்லான் மற்றும் ஹெராத் உட்பட இதுவரை 6 ஆயிரத்துக்கும் மேற்பட்ட வீடுகள் அடித்துச் செல்லப்பட்டுள்ளன.
உலக உணவுத் திட்டம் (WFP) மே 12 அன்று திடீர் வெள்ளம் ஆப்கானிஸ்தானை அழித்ததாக அறிவித்தது.
பாக்லானில் மட்டும் 300க்கும் மேற்பட்டோர் உயிரிழந்துள்ளனர். அங்கு இன்னும் 100க்கும் மேற்பட்டோரை காணவில்லை.
அமெரிக்க செய்தி சேனலான CNN படி, ஆப்கானிஸ்தானில் வெள்ளம் காரணமாக பல்வேறு மாவட்டங்களில் ஆயிரக்கணக்கான வீடுகள், ஆயிரக்கணக்கான ஹெக்டேர் விவசாய நிலங்கள் மற்றும் நூற்றுக்கணக்கான விலங்குகள் அடித்து செல்லப்பட்டுள்ளன.
சர்வதேச மீட்புக் குழுவின் (IRC) கூற்றுப்படி, ஆப்கானிஸ்தானின் பெரும்பாலான மாநிலங்களில் அவசரநிலை போன்ற சூழ்நிலை உள்ளது.
பல குழுக்கள் நிவாரணப் பணியில் ஈடுபட்டுள்ளன.
ஃபிரோஸ்-கோ நகரில் 4 ஆயிரத்துக்கும் மேற்பட்ட வீடுகள் சேதமடைந்துள்ளன. அங்கு சுமார் 2 ஆயிரம் கடைகள், 2 ஆயிரம் வீடுகள் வெள்ளத்தில் அடித்துச் செல்லப்பட்டுள்ளன. இது தவிர, 300க்கும் மேற்பட்ட கால்நடைகள் இறந்துள்ளன.
ஐநா வளர்ச்சித் திட்டத்தின் (UNDP) படி, அவர்கள் ஆப்கானிஸ்தான் அரசாங்கத்துடன் நெருக்கமாக பணியாற்றி வருகின்றனர்.
நிவாரணப் பொருட்களை வழங்குவதற்காக UNDP பல சர்வதேச தன்னார்வ தொண்டு நிறுவனங்களைத் தொடர்பு கொண்டுள்ளது.
UNDP இதுவரை 300க்கும் மேற்பட்ட தற்காலிக வீடுகளை கட்டியுள்ளது. கடந்த 3 வாரங்களாக பல பகுதிகளில் மின்சாரம் இல்லை.
கடந்த மாதம் ஆப்கானிஸ்தானில் பெய்த கனமழையால் 70க்கும் மேற்பட்டோர் உயிரிழந்தனர்.
பருவநிலை மாற்றமே மழைக்கு காரணம் என நிபுணர்கள் தெரிவித்துள்ளனர்.