80 சீட் வேண்டும்: அ.தி.மு.க., கூட்டணியில் சேர விஜய் நிபந்தனை

அ.தி.மு.க.,வுக்கு, 154; த.வெ.க.,வுக்கு, 80 என தொகுதி பங்கீடு செய்து, சட்டசபை தேர்தலை கூட்டாக சந்திக்க, இரு கட்சிகளும் பேசி வருகின்றன.

ஜெயலலிதா மறைவுக்கு பின், அ.தி.மு.க., தொடர் தோல்வியை சந்தித்து வருகிறது. சசிகலா, தினகரன், பன்னீர்செல்வம் நீக்கப்பட்ட பின், தென் மாவட்டங்களில் அக்கட்சியின் ஓட்டு வங்கி குறைந்துள்ளது.

ஆனால், நீக்கியவர்களை மீண்டும் சேர்க்க முடியாது என்பதில், பொதுச்செயலர் பழனிசாமி உறுதியாக இருக்கிறார். பா.ஜ.,வுடன் மீண்டும் கூட்டணி இல்லை என்பதிலும் தெளிவாக இருக்கிறார்.

உடையவில்லை

அதேநேரம், ஆளும் தி.மு.க., கூட்டணியில் சலசலப்புகள் எழுந்தாலும், பழனிசாமி கணித்தது போல, அது உடையவில்லை. 'அடுத்த தேர்தலை சேர்ந்தே சந்திப்போம்' என்று, அதில் இடம் பெற்றுள்ள காங்கிரஸ், கம்யூனிஸ்ட், விடுதலை சிறுத்தைகள் மற்றும் முஸ்லிம் லீக் கட்சிகள் கூறுகின்றன.

அந்த கூட்டணியை பழனிசாமியால் எப்படி எதிர்கொள்ள முடியும் என்று, அவரது கட்சியினரே திகைத்து நின்ற நேரத்தில், நடிகர் விஜய் களமிறங்கி இருக்கிறார்.

தி.மு.க., எதிர்ப்பை அவர் பிரதானமாக கையில் எடுத்திருப்பது, அ.தி.மு.க.,வுக்கு இணக்கமான அம்சம். எம்.ஜி.ஆர்., உருவாக்கிய அக்கட்சியை விஜய் இதுவரை விமர்சிக்கவில்லை என்பது, இன்னொரு பிளஸ் பாயின்டாக பார்க்கப்படுகிறது.

ஆட்சி, அதிகாரத்தில் இல்லாத கட்சியை விமர்சனம் செய்வதில் அர்த்தம் இல்லையே என்று, விஜய் கட்சியினர் விளக்கம் அளிக்கின்றனர்.

அதில், நியாயம் இருந்தாலும், பாரம்பரியமான தி.மு.க., எதிர்ப்பு ஓட்டுகளை வைத்துள்ள அ.தி.மு.க.,வை விமர்சிப்பது, தன் புதிய கட்சியின் வளர்ச்சிக்கு உதவாது என்பதை விஜய் உணர்ந்துள்ளார். இதையே அவரது மவுனம் காட்டுவதாக அரசியல் விமர்சகர்கள் கூறுகின்றனர்.

இந்தியாவில், 50 சதவீத ஓட்டுகளுக்கு மேல் வாங்கி, உண்மையான பெரும்பான்மையுடன் எந்த கட்சியும் ஆட்சிக்கு வருவது இல்லை. 25 முதல், 30 சதவீத ஓட்டுகளை பெற்று, பெரும்பான்மை இடங்களில் வெற்றி பெற்று ஆட்சி அமைப்பதே வாடிக்கையாக நடக்கிறது.

தக்கவைக்கின்றன

அதாவது, எதிர்ப்பு ஓட்டுகள் பல கட்சிகளுக்கு பிரிந்து செல்வதால், பிரதான கட்சி ஆட்சியை பிடிக்கவோ, தக்க வைக்கவோ முடிகிறது.

இந்த பின்னணியில் தான், பலமான கூட்டணிக்கு அவசியம் ஏற்படுகிறது. பழனிசாமியும், விஜயும் அப்படிப்பட்ட ஒரு கூட்டணியை உருவாக்க வேண்டிய கட்டாயத்தில் இருக்கின்றனர். இளைஞர் பட்டாளத்தை எளிதில் திரட்டும் சக்தி பெற்றவர் என்பதை, முதல் மாநாடு வாயிலாக விஜய் நிரூபித்து உள்ளார்.

ஓட்டு வங்கியில் விரிசல் விழுந்தாலும், எம்.ஜி.ஆர்., ஜெயலலிதா விசுவாசிகள் வெளியேறவில்லை என்பதை பழனிசாமி காட்டியுள்ளார். இருவரின் பலமும் சேரும் போது, தி.மு.க.,வின் வலுவான கட்டமைப்பை சேதப்படுத்த முடியும் என்று அவர்கள் நம்புகின்றனர்.