அமெரிக்க திட்டத்தை நிராகரித்த ஹமாஸ் - போர் நிறுத்த பேச்சுவார்த்தையில் சிக்கல்!

அமெரிக்க மத்திய கிழக்கு தூதர் ஸ்டீவ் விட்காஃப் முன்வைத்த "விட்காஃப் வரைவு" திட்டத்தை ஹமாஸ் நிராகரித்ததாக இஸ்ரேல் பிரதமர் பெஞ்சமின் நெதன்யாகு அலுவலகம் அறிவித்துள்ளது.

இந்த திட்டம், ரமலான் மற்றும் பாஸ்கா பண்டிகைகள் வரை, அதாவது ஏப்ரல் 20 வரை போர் நிறுத்த ஒப்பந்தத்தின் ஆரம்ப கட்டத்தை நீட்டிக்க முயன்றது.

ஹமாஸின் மறுப்புக்கு பதிலடியாக, இஸ்ரேல் காசா மீது முழு முற்றுகையை அமல்படுத்தியுள்ளது. "எங்கள் பிணைக்கைதிகள் விடுவிக்கப்படாமல் இஸ்ரேல் போர் நிறுத்தத்தை அனுமதிக்காது" என்று அறிவித்துள்ளது.

ஹமாஸ் இதே நிலைப்பாட்டில் தொடர்ந்தால் "மேலும் விளைவுகள்" ஏற்படும் என்றும் அரசாங்கம் எச்சரித்துள்ளது.

இஸ்ரேலின் நடவடிக்கைகளை ஹமாஸ் கடுமையாக கண்டித்துள்ளது. "மலிவான மிரட்டல், போர் குற்றம் மற்றும் [போர் நிறுத்த] ஒப்பந்தத்தின் மீது வெளிப்படையான தாக்குதல்" என்று முத்திரை குத்தியுள்ளது.

இந்த மோதலில் முக்கிய மத்தியஸ்தராக இருக்கும் எகிப்து, இஸ்ரேல் "பசியை ஒரு ஆயுதமாக பயன்படுத்துகிறது" என்று குற்றம் சாட்டியுள்ளது.

இந்நிலையில், அதிகரித்த பதட்டங்கள் மற்றும் குற்றச்சாட்டுகள் இருந்தபோதிலும், இஸ்ரேல் அல்லது ஹமாஸ் போர் நிறுத்தம் முழுமையாக முடிவடைந்துவிட்டதாக அதிகாரப்பூர்வமாக அறிவிக்கவில்லை என்பது குறிப்பிடத்தக்கது.