எலான் மஸ்க்கின் மன்னிப்பை ஏற்றுக் கொண்ட டிரம்ப்

அமெரிக்க ஜனாதிபதி டொனால்ட் டிரம்ப்பிடம் உலகின் முன்னணி தொழிலதிபர்களில் ஒருவரான எலான் மஸ்க் மன்னிப்பு கேட்டுள்ளார்.

அமெரிக்க ஜனாதிபதி டொனால்ட் டிரம்ப் மற்றும் டெஸ்லா தலைமை நிர்வாக அதிகாரி எலான் மஸ்க் ஆகியோருக்கிடையே சமீபத்தில் ஏற்பட்ட பொது மோதல் தற்போது தணிந்துள்ளது.

மஸ்க் தனது முந்தைய கருத்துக்களுக்காக மன்னிப்பு கேட்டுள்ளதால், இருவருக்கும் இடையிலான இந்த மோதல் முடிவுக்கு வந்துள்ளது.

சமூக ஊடகங்களில் முக்கியமாக வெளிப்பட்ட இந்த கருத்து வேறுபாடு, அமெரிக்க அரசின் வரி மற்றும் செலவு மசோதா தொடர்பாக உருவானது.

இந்த மோதலின் ஆரம்பம், டிரம்ப் நிர்வாகத்தின் "பிக் பியூட்டிஃபுல் பில்" என்று அழைக்கப்பட்ட வரி குறைப்பு மசோதாவை மஸ்க் விமர்சித்ததுடன் தொடங்கியது.

செனட்டில் தாக்கல் செய்யப்பட்ட இந்த மசோதாவை மஸ்க் "முட்டாள்தனமானது" என்று வர்ணித்தார். இதற்கு பதிலடியாக, மஸ்க்கின் நிறுவனங்களுக்கான அரசு மானியங்கள் மற்றும் ஒப்பந்தங்களை நிறுத்தப்போவதாக டிரம்ப் அச்சுறுத்தியதாகத் தெரிவிக்கப்பட்டது.

இந்த கருத்துப் பரிமாற்றம் மேலும் தீவிரமடைந்தது. சிறுமிகள் பாலியல் துஷ்பிரயோக நெட்வொர்க் தொடர்பான சர்ச்சைக்குரிய எப்ஸ்டீன் கோப்புகளில் டிரம்ப்பின் பெயர் இருந்ததாகவும், அதனால்தான் விசாரணை விவரங்கள் பகிரங்கப்படுத்தப்படவில்லை என்றும் எலான் மஸ்க் குற்றம் சாட்டினார்.

இதற்கு டிரம்ப் பதிலளிக்கும்போது, மஸ்க் "சுயநினைவை இழந்துவிட்டார்" என்றும், தன்னால் அவருடன் பேச முடியாது என்றும் தெரிவித்தார்.

இந்த இரண்டு முக்கிய ஆளுமைகளுக்கும் இடையிலான உயர்மட்ட மோதல் உலக அளவில் பெரும் கவனத்தைப் பெற்றது.

இருப்பினும், இந்த விவகாரம் தற்போது ஒரு தீர்மானத்திற்கு வந்துள்ளது. எலான் மஸ்க் சமீபத்தில் X தளத்தில், "கடந்த வாரம் அதிபர் டொனால்ட் டிரம்ப் குறித்து நான் பதிவிட்ட சில கருத்துக்கள் வரம்பு மீறிச் சென்றுவிட்டன. அதற்காக நான் வருத்தம் தெரிவிக்கிறேன்," என்று குறிப்பிட்டிருந்தார்.

எலான் மஸ்கின் மன்னிப்பை டொனால்ட் டிரம்ப் ஏற்றுக்கொண்டார். மஸ்க் மன்னிப்பு கேட்டது "மிகவும் நல்ல விஷயம்" என்று டிரம்ப் பதிலளித்தார்.