சீஸ் சாப்பிடுவதால் உடல் எடை குறையுமா?

சீஸ் சாப்பிடுவது ஆரோக்கியமானது என்று நிபுணர்கள் கூறுகிறார்கள், ஏனெனில் அதில் புரோட்டீன் அதிகமாக உள்ளது. ஆனால் எல்லா சீஸும் ஆரோக்கியமானவை அல்ல, நாம் சாப்பிடும் சீஸ் வகை முக்கியமானது. அதிலும் பல நிபுணர்கள் ஒப்புக்கொண்ட ஒரு விஷயம் என்னவென்றால், லேபிள்களைச் சரிபார்த்த பின்னரே ஆரோக்கியத்திற்கு ஏற்ற சீஸ் வகையைத் தேர்ந்தெடுப்பது புத்திசாலித்தனம் எனக் கூறுகின்றனர்.

க்ஷேமவனாவின் தலைமை நல்வாழ்வு அதிகாரி டாக்டர் நரேந்திர கே ஷெட்டி கூறியதாவது, "முதலில், சீஸ் பாக்கெட்டில் உள்ள தகவல்களைப் படியுங்கள். அதில் எவ்வளவு கொலஸ்ட்ரால் மற்றும் கொழுப்பு உள்ளது என்பதைச் சரிபார்க்கவும். நீங்கள் எடை குறைக்க முயற்சிக்கிறீர்கள் என்றால் இது மிகவும் முக்கியம். அதேபோல், அதில் எவ்வளவு கால்சியம் மற்றும் பிற ஊட்டச்சத்துக்கள் உள்ளன என்பதைச் சரிபார்க்கவும். இதன் மூலம் நமது ஆரோக்கியத்திற்கு ஏற்ற சிறந்த சீஸ் வகையை நாம் தேர்வு செய்யலாம்" என்று கூறியுள்ளார்.

அதிலும், சீஸ் தயாரிக்கப்பட்ட தேதியையும், காலாவதி தேதியையும் சரிபார்க்க வேண்டும். இது தவிர, ஒரு நாளைக்கு எவ்வளவு சாப்பிட வேண்டும் என்பது பற்றிய தகவல்களையும் நாம் சரிபார்க்க வேண்டும் என்று அவர் கூறுகிறார். மருத்துவர்களின் கூற்றுப்படி, பதப்படுத்தப்பட்ட சீஸைத் தவிர்த்து, உப்பு, பிரிசர்வேட்டிவ் மற்றும் 
ரசாயனங்கள் குறைவாக உள்ள சீஸ்களைத் தேர்ந்தெடுக்கவும்.

சீஸ் எடை குறைப்புக்கு உதவுமா?: பெங்களூருவின் கெங்கேரியில் உள்ள க்ளெனீகிள்ஸ் பிஜிஎஸ் மருத்துவமனையின் மருத்துவ ஊட்டச்சத்து நிபுணரான டாக்டர் கார்த்திகை செல்வி ஏ, "சரியான சீஸைத் தேர்ந்தெடுப்பது உங்கள் எடையைக் குறைக்க உதவும். நாம் உண்ணும் உணவில் கொழுப்பு குறைவாகவும், காய்கறிகள் அதிகமாகவும் இருக்க வேண்டும். எனவே காய்கறிகள், பழங்கள் மற்றும் குறைந்த கொழுப்புள்ள சீஸை சாப்பிடுங்கள்" என்று கூறியுள்ளார்.

சீஸ் சத்தானது என்றாலும், அதை அதிகமாக எடுத்துக் கொள்வது நல்லதல்ல. எனவே ஒரு நாளைக்கு தோராயமாக 1 முதல் 3 முறை சீஸ் சாப்பிடலாம் என்று நிபுணர்கள் பரிந்துரைக்கின்றனர். உங்கள் உடலுக்கு எவ்வளவு கலோரிகள் தேவை என்பதைப் பொறுத்து சீஸின் அளவை முடிவு செய்யுங்கள்.

பன்னீர்: பன்னீர் எளிமையானது மற்றும்  எளிதில் கிடைக்கக்கூடியது. பன்னீரில் புரோட்டீன் அதிகமாகவும், கொழுப்பு குறைவாகவும் உள்ளது. மேலும் பன்னீர் சாப்பிடுவது தசை வளர்ச்சிக்கு உதவுகிறது.

மொஸரெல்லா: மற்ற சீஸ்களை விட மொஸரெல்லா சீஸில் உப்பு குறைவாகவும், கால்சியம் அதிகமாகவும் உள்ளது.
ஃபெட்டா சீஸ்: இந்த சீஸில் நன்மை அளிக்கும் புரோபயாடிக்குகளைக் கொண்டுள்ளது மற்றும் இதை சாலட்டுடன் சாப்பிடலாம், ஆனால் இதில் உப்பு சற்று அதிகமாக உள்ளது.

ரிக்கோட்டா சீஸ்: இது கொழுப்பு நீக்கப்பட்ட பாலில் இருந்து தயாரிக்கப்படுகிறது. இந்த ரிக்கோட்டா சீஸ் ஆனது மென்மையானது, லேசானது, கிரீமியான அமைப்பு கொண்டது மற்றும் சற்று இனிப்பு சுவையைக் கொண்டது.

சீஸை யார் சாப்பிடக்கூடாது?: எல்லோரும் சீஸ் சாப்பிடலாம், ஆனால் வயிற்றுப் பிரச்சினைகள், இதயப் பிரச்சினைகள் மற்றும் உயர் இரத்த அழுத்தம் உள்ளவர்கள் சீஸ் சாப்பிடுவதை குறைத்துக் கொள்ள வேண்டும். கர்ப்பிணிப் பெண்கள் மென்மையான சீஸ் சாப்பிடக்கூடாது. லாக்டோஸ் ஒவ்வாமை உள்ளவர்கள் சீஸ் சாப்பிடுவதற்கு முன்பு மருத்துவரை அணுக வேண்டும் என்று டாக்டர் செல்வி கூறுகிறார்.

சீஸைச் சேர்த்துக் கொள்வதற்கான வழிகள்: சீஸ் சாப்பிட வேண்டும், ஆனால் அதை பீட்சா, பர்கர்கள் ஆகியவற்றில் சேர்த்து சாப்பிடக்கூடாது. அதற்கு பதிலாக சாலடுகள், பன்னீர் புர்ஜி, பாஸ்தா, சப்பாத்தி, ஆம்லெட் ஆகியவற்றுடன் சீஸ் சேர்த்து சாப்பிடலாம்.