ஈரான் பிரெஞ்சுப் படைகளைத் தாக்குமா? இஸ்ரேலிற்காக பிரான்ஸ் களமிறங்குமா?

மத்திய கிழக்கு பகுதியிலுள்ள இஸ்ரேல்-ஈரான் போர் தீவிரமாகி வரும் நிலையில், ஈரான், இஸ்ரேலுக்கு ஆதரவாக செயல்படும் நாடுகளின் படைகள் தாக்கப்படும் என எச்சரிக்கை விடுத்துள்ளது. இதன் பகுதியாக, பிரான்ஸ் படைகளும் ஈரானின் இலக்காகக் காணப்படுகின்றன.

தற்போது ஐக்கிய அரபு அமீரகங்களில் சுமார் 650 பிரஞ்சுப் படையினர் மூன்று மையங்களில் உள்ளனர்:

அபுதாபியில் உள்ள கடற்படை தளம்
Al Dhafra வான்படைத் தளம், 
Zayed Military City-யில் உள்ள சுரங்கப்படை தளம்

இந்த இடங்கள் பிரான்சின் பாலைவனப் போர்ப்பயிற்சி மற்றும் மத்திய கிழக்கு ராணுவ ஆதரவு நடவடிக்கைகளுக்கு முக்கியத்துவம் வாய்ந்தவை.

ஜிபூட்டியில் (Djibouti), 1,500-க்கும் மேற்பட்ட படையினர் பிரான்ஸ்-ஜிபூட்டி பாதுகாப்பு உடன்படிக்கையின் கீழ் நிலைபெற்றுள்ளனர். அவர்கள் பிராந்திய பாதுகாப்பு, கடல்சார் விநியோக பாதைகள் மற்றும் கிழக்கு ஆப்பிரிக்கக் கடற்பரப்பின் பாதுகாப்பில் ஈடுபட்டுள்ளனர்.

மேலும், சிரியா மற்றும் ஈராக்கில், 'ஓப்பரேஷன் சமால்' (opération CHAMMAL) என்ற நடவடிக்கையின் கீழ் 600 படையினர் பங்கேற்கின்றனர்.

இதில் 10 Rafale விமானங்கள், ஒரு ரடார் விமானம் (E-3F AWACS), மற்றும் கடற்படைக்குப் உட்பட்ட பல்வேறு உபகரணங்களும் ஈடுபட்டுள்ளன.

இத்துடன், லெபனானில் சுமார் 700 வீரர்கள் 'ஓப்பரேஷன் டமான்' மூலம் ஐநாவின் இடைக்கால அமைதி படையணியில் (UNIFIL) பணியாற்றி வருகின்றனர்.

பிரான்ஸ் இஸ்ரேலுக்காகத் தாக்குதல் நடவடிக்கைகளில் தற்போதைக்கு நேரடியாக ஈடுபடவில்லை. ஆனால், தேவையான நேரத்தில் பாதுகாப்பு மற்றும் எதிர்ப்பு நடவடிக்கைகளில் பங்கேற்பதற்கான தயார் நிலை உள்ளது என ஜனாதிபதி மக்ரோன் வெளிப்படையாகத் தெரிவித்துள்ளார்.

கடந்த வருடம், 2024-இல் ஈரான் இஸ்ரேலுக்கு மேற்கொண்ட தாக்குதல்களில் பிரான்ஸ் சில ஏவுகணைகள் மற்றும் ட்ரோன்களை தடுத்து நிறுத்தியதும் குறிப்பிடத்தக்கது.

இந்தச் சூழ்நிலையை முன்னிட்டு, பிரான்சின் ராணுவத் தளங்கள், குறிப்பாக அமீரகம், ஜிபூட்டி, சிரியா, லெபனான் போன்ற இடங்களில் உள்ளவை, எதிர்கால எச்சரிக்கைகள் அல்லது தாக்குதல்களுக்கு கவனமாக கண்காணிக்கப்படுகின்றன.