காஸாவில் பேரவலம் : தோற்று விட்டதா உலகம் ?

23 ஐப்பசி 2023 திங்கள் 02:22 | பார்வைகள் : 2644

மனிதகுலத்தின் உச்ச தோல்வி எதுவென்றால், தயக்கமின்றி காஸாவின் மீது விரல் நீட்டலாம்.

அங்கு நிகழும் மனிதப் பேரவலத்தை விபரிக்கும் அவசியம் கிடையாது. அது ஏறத்தாழ முழு உலகமும் அறிந்ததே.

தீவிரம் அறிந்தும் பேரவலத்தைத் தடுத்து நிறுத்த முடியாத உலக ஒழுங்கும், சர்வதேச ராஜதந்திரமும் மனித குல வளர்ச்சியின் சாபம்.

வரலாறு நெடுகிலும் இழைக்கப்பட்ட தவறுகளால், இன்று பலஸ்தீன மக்கள் தாம் வாழ வேண்டிய மண்ணில் அகதிகளாக இருக்கிறார்கள். அதுவும் நிரூபிக்கப்பட்ட உண்மை.

இன்று காஸாவில் அடைத்து வைக்கப்பட்டு, இஸ்ரேலிய படைகளால் முற்றுகையிடப்பட்டுள்ள பலஸ்தீனர்களுக்கு நாளை என்னவாகும்? எத்தனை பேர் உயிருடன் இருக்கப் போகிறார்கள்?

உலக சமாதானத்திற்கும், பாதுகாப்பிற்கும் பொறுப்பான பிரதான அமைப்பாக ஐக்கிய நாடுகள் சபை.

ஐ.நா. பாதுகாப்புச் சபை இரு தடவைகள் கூடியது. ஒக்டோபர் 8ஆம் திகதி ஒரு தடவை, 13ஆம் திகதி மறுதடவை.

எதுவித தயை தாட்சண்யமும் இன்றி, இஸ்ரேல் குண்டுத் தாக்குதல்களை நடத்தி வரும் சந்தர்ப்பத்தில், கூடியவர்கள் கலைந்து சென்றார்கள்.

உடனடி போர் நிறுத்தம் கோரி ரஷ்ய பிரதிநிதி சமர்ப்பித்த நகல் பிரேரணை, வீட்டோ அதிகாரத்தால் ரத்துச் செய்யப்பட்டு, குப்பைக் கூடைக்குள் சென்றது.

அடுத்த கூட்டம் மூடிய அறைக்குள் இடம்பெற்றது.

காஸா நிலப்பரப்பிற்கு உணவு, குடிநீர், எரிபொருள் உள்ளிட்ட எந்தவொரு பொருளையும் அனுப்பப் போவதில்லையென இஸ்ரேல் தீர்மானித்திருந்த நேரம்.

இஸ்ரேலின் தாக்குதலில் ஆயிரக்கணக்கான பலஸ்தீனர்கள் - அதுவும் அனேகமான சிறுவர்கள் - கொல்லப்பட்டிருந்த பின்புலம்.

மூடிய அறையில் கூடியவர்களுக்கு கொஞ்சமேனும் மனசாட்சி இருந்திருக்கலாம். மனமொன்றுபட்டு, இரத்தகளரியை நிறுத்த வேண்டும் என தீர்மானித்திருக்கலாம்.

ஆனால், ஒன்றுகூடியவர்களுக்கு அவரவர் அரசியல் முக்கியமானதாக இருந்தது. மேலைத்தேய நாடுகள் ஹமாஸைக் கண்டிப்பதில் குறியாக இருந்தன.

மக்களை சாவின் பிடியில் இருந்து காப்பாற்றுவதை விடவும் எது பயங்கரவாதம் என்ற கேள்விக்கு பதில் தேடுவதில் மேலைத்தேய இராஜதந்திரிகள் அக்கறை காட்டினார்கள்.

அன்று பாதுகாப்புச் சபையின் அங்கத்துவ நாடுகள் ஐக்கியப்பட்டு, குறைந்தபட்சம் தாக்குதலை நிறுத்துமாறு இஸ்ரேலை எச்சரிக்கக்கூடிய தீர்மானத்தை ஏகமனதாக நிறைவேற்றியிருக்கலாம்.

அத்தகைய தீர்மானம் இஸ்ரேலின் கண்மூடித்தனமான படைக் குவிப்பையும், ரொக்கட் தாக்குதலையும் சற்றேனும் தடுத்து நிறுத்தியிருக்கும்.

ஒருவேளை, ஒரு வைத்தியசாலையில் நூற்றுக்கணக்கான உயிர்கள் பலிகொண்ட தாக்குதல் நிகழக்கூடிய சூழ்நிலையை இல்லாமல் செய்வதில் தாக்கம் செலுத்தியிருக்கவும் கூடும்.

இன்று ஐக்கிய நாடுகள் சபையால் செய்ய முடிந்ததெல்லாம், வன்முறை பற்றி கவலைப்பட்டு அறிக்கை விடுவதும், காஸா மக்களுக்கு தேவையான பொருட்களை அனுப்புமாறு கோரிக்கை விடுப்பதும் தான்.

பலஸ்தீனர்களின் நெருக்கடி என்பது பாதுகாப்புச் சபையின் நிகழ்ச்சி நிரலில் ஆரம்பகாலத்தில் இருந்து இடம்பிடித்த விடயம்.

இன்று ஏழு தசாப்தங்களுக்கு மேலாக பலஸ்தீனர்கள் அனுபவித்து வரும் பேரவலங்களைப் போன்று எந்தவொரு இனக்குழுமமும் கஷ்டப்பட்டு இருக்க மாட்டாது.

இந்த மக்களுக்கு இழைக்கப்பட்டதைப் போன்று எந்தவொரு மக்கள் கூட்டத்திற்கும் அநீதி இழைக்கப்பட்டிருக்க மாட்டாது.

இருந்தபோதிலும், இன்றுகூட காஸாவில் வாழும் 23 இலட்சம் பலஸ்தீனர்களின் இருப்பைக் கேள்விக்கு உட்படுத்தக்கூடிய அராஜகங்கள் பற்றி ஐ.நா. பாதுகாப்புச் சபையால் எதுவும் செய்ய முடியாத சூழ்நிலை.

காஸா மக்கள் இன்றுள்ள அவல நிலைக்கு இஸ்ரேலின் அடாவடித்தனமும், மேற்குலகின் அராஜகமும் தான் காரணம் என்றால், ஐநாவின் பாதுகாப்புச் சபையிலும், பொதுச்சபையிலும் நிறைவேற்றப்பட்ட தீர்மானங்களைத் தாண்டியே சகல நடவடிக்கைகளும் எடுக்கப்பட்டிருக்கின்றன.

இன்றைய இஸ்ரேலிய பலஸ்தீன நெருக்கடியைப் பொறுத்தவரையில், எதுவும் செய்ய முடியாத நிலையில் ஐக்கிய நாடுகள் சபை உள்ளதாயின், எதையும் செய்யக்கூடிய ஜாம்பவனாக தன்னைக் காட்டிக் கொள்வது அமெரிக்கா தான்.

மத்திய கிழக்கு பிராந்தியத்தில் எவரும் சவால் விடுக்க முடியாத சக்தியாக உருவெடுத்து, தமது தேவைகளை நிறைவேற்றக்கூடிய பிராந்திய ஒழுங்கை உருவாக்க முனைந்தது, அன்றும் இன்றும் அமெரிக்காவே தான்.

அன்று அமெரிக்கா விட்ட தவறுகளை சற்று மறந்து விடுவோம். இன்றைய நிலைமையை ஆராய்வோம்.

ஆண்டாண்டு கால ஒடுக்குமுறைகளையும், அநீதிகளையும் ஒதுக்கி விட்டுப் பார்த்தால் கூட, இன்றைய ஆயுத நெருக்கடியின் தொடக்கப்புள்ளி ஹமாஸ் இயக்கம் காஸாவைத் தாண்டி இஸ்ரேலிய படைகள் மீதும் மக்கள் மீதும் நடத்திய தாக்குதல் தான்.

இந்தப் புள்ளி நோக்கி ஹமாஸ் இயக்கம் ஏன் தள்ளப்பட்டது என்பதை ஆராய்ந்தால், அது அமெரிக்காவின் குள்ளநரித்தனத்தால் விளைந்த சூழல்தானெனப் புரிந்து கொள்ள முடியும்.

மத்திய கிழக்கில் தமக்கு சாதகமான அரசியல் ஒழுங்கை உருவாக்கி விட்ட அமெரிக்காவிற்கு வெளிவிவகாரக் கொள்கைகளில் இஸ்ரேலிய, பலஸ்தீன நெருக்கடியை விடவும் சீனா முக்கியமானதாக மாறியது.

2021ஆம் ஆண்டு மார்ச் மாதம் ஜோ பைடன் வெளியிட்ட இடைக்கால தேசிய பாதுகாப்பு வழிகாட்டலில், மத்திய கிழக்கை பின்னுக்குத் தள்வி விட்டு சீனாவை முன்னுக்கு கொண்டு வந்திருந்தார்.

ஏதோவொரு பிரச்சினையில் தலையிடும் தரப்பு, அந்தப் பிரச்சினையைத் தீர்ப்பதற்காக மேற்கொள்ளும் தவறான தீர்மானத்தை விடவும், எதுவும் செய்யாமல் இருப்பது அதிக பாதிப்பை ஏற்படுத்தும் என்பது மத்திய கிழக்கு விவகாரத்தில் நிரூபணமானது.

இஸ்ரேலியப் பிரதமர் பெஞ்சமின் நெத்தன்யாஹுவின் அரசாங்கம் கடந்த காலங்களை விடவும் தீவிரமான முறையில் குடியிருப்புக்களை அமைத்து வருவதை ஜோ பைடன் கவனித்திருக்க வேண்டும். கண்டித்திருக்க வேண்டும்.

பெஞ்சமின் நெத்தன்யாஹு தேர்தல் வெற்றிக்காக மிகவும் தீவிர வலது சாரிக் கொள்கைகளை அனுசரிக்கும் அரசியல்வாதிகளோடு கூட்டு சேர்வதால் ஏற்படக்கூடிய விளைவுகளை அனுமானித்திருக்க வேண்டும். மதரீதியான ஸியோனிஸத்தைத் தூண்டும் ஒருவர் அல் அக்ஸா பள்ளிவாசலுக்கு சென்று ஹமாஸ் இயக்கத்தை ஆத்திரப்படுத்தியபோது, இந்த மாதிரியான செயல்கள் கூடாதென கண்டித்திருக்க வேண்டும்.

மத்திய கிழக்கு நெருக்கடிக்கு இராஜதந்திர தீர்வு காண வேண்டும் என்பதில் அதீத ஆர்வம் காட்டி வருபவர், ஜோன் கெரி என்ற இராஜதந்திரி.

இவர் நெத்தன்யாஹுவுடன் 375 தடவைகளும், பலஸ்தீன அதிகாரசபையின் தலைவர் மஹ்மூத் அப்பாஸுடன் 34 தடவைகளும் பேசியவர். இஸ்ரேலுக்கு 40 தடவைகள் விஜயம் செய்திருக்கிறார்.

எங்கே அபாயம் நிகழக்கூடிய ஆபத்து இருக்கிறதோ, அங்கு மௌனம் காப்பதும் மெத்தனப் போக்காக நடந்து கொள்வதும் மிகவும் பாரதூரமான விளைவுகளை ஏற்படுத்தும். இது மத்திய கிழக்கு விவகாரத்தில் அப்பட்டமான உண்மை என்பதை ஜோன் கெரி தெளிவாக எடுத்துரைத்துள்ளார்.

இன்று ஜோன் கெரியின் ஆலோசனை எங்கே போனது?

ஜோ பைடனுக்குத் தேவைப்பட்டதெல்லாம், மத்திய கிழக்கை சற்று ஒதுக்கி வைத்து விட்டு, சீனாவை சமாளிக்க கொள்கைகளை வகுப்பது தான்.

இதற்காக டொனால்ட் ட்ரம்ப் ஆரம்பித்த திட்டத்தை அவர் கையில் எடுத்தார். மத்திய கிழக்குப் பிராந்தியத்தில் உள்ள அரேபிய முஸ்லிம் நாடுகளுடன் இஸ்ரேலை கைகோர்க்கச் செய்து விட்டு, அங்கிருந்து சூசகமாக வேறு பக்கம் பார்வையைத் திருப்புவது அவரது நோக்கம்.

மதரீதியான வரலாற்றுக் காரணங்களின் அடிப்படையில் யூதர்களும் இஸ்லாமியர்களும் ஒன்றென்ற தோற்றப்பாட்டை ஏற்படுத்துவதற்காக ஆப்ரஹாம் உடன்படிக்கைகள் உருவாக்கப்பட்டன.

இந்த உடன்படிக்கைகளில் ஐக்கிய அரபு எமிரேட்ஸ், பஹ்ரேன், மொரொக்கோ சூடான் போன்ற நாடுகளை இணைத்து இஸ்ரேலுடன் கைகோர்க்கச் செய்வது பைடனின் இராஜதந்திரம்.

மத்திய கிழக்கில் சமாதானத்தைக் கொண்டு வரும் உடன்படிக்கைகளில் பலஸ்தீனர்கள் இருக்கவில்லை என்பது மிகவும் கசப்பான உண்மை.

கடந்த புதன்கிழமை ஜெருசலேமிற்கு சென்று எதுவோ வேதம் ஒதுவதைப் போல ஜோ பைடன் எதையோ சொல்லி விட்டுப் போயிருக்கிறார்.

இந்த விடயங்களில் காஸாவில் வாழும் மக்களின் பேரவலத்திற்கு முற்றுப்புள்ளி வைக்கக்கூடிய எதுவும் கிடையாது.

அமெரிக்கா தான் அப்படியென்றால், பெரும்பாலான முஸ்லிம் நாடுகளும் இஸ்ரேலைக் கண்டிப்பதைத் தாண்டி எதுவுமே செய்வதாகத் தெரியவில்லை.

ஜோ பைடன் ஜோர்தானில் முஸ்லிம் நாடுகளின் தலைவர்களுடன் நடத்தவிருந்த சந்திப்பு ரத்துச் செய்யப்பட்டுள்ளது. ஓ.ஐ.சி. எனப்படும் இஸ்லாமிய நாடுகள் ஸ்தாபனமும், அரேபிய லீக்கும் கண்டன வார்த்தைகளுடன் அறிக்கை விட்டுள்ளன.

சவூதி அரேபிய இளவரசரும், ஈரானிய ஜனாதிபதியும் பேச்சுவார்த்தை நடத்தியுள்ளனர். அமெரிக்க இராஜாங்க செயலாளரை சவூதி வெளிவிவகார அமைச்சர் சந்திப்பார் என கூறப்படுகிறது. காஸாவை முற்றுகையிட்டால் விளைவுகள் பாரதூரமானவையாக இருக்கும் என ஈரானிய ஜனாதிபதி எச்சரித்துள்ளர்.

ஆனால், இஸ்ரேலுக்கு கடிவாளம் இடுமாறு அமெரிக்காவின் மீது அழுத்தத்தைத் தொடுக்கக்கூடிய நிலையில் உள்ள இஸ்லாமிய நாடுகள் கூட்டாக எதனையும் செய்யவில்லை.

பல முஸ்லிம் நாடுகளில் இஸ்ரேலுக்கு ஆட்சேபம் தெரிவிக்கும் வகையிலான ஆர்ப்பாட்டங்கள் இடம்பெற்று வருகின்றன. அமெரிக்கா, பிரிட்டன், பிரான்ஸ், சுவீடன் நோர்வே முதலான மேலைத்தேய நாடுகளிலும் மக்கள் ஆங்காங்கே ஆர்ப்பாட்டம் செய்கிறார்கள்.

உலகளாவிய ரீதியில் பலஸ்தீன மக்களுக்கு ஆதரவாக அலையொன்று எழுவதாகத் தோன்றியபோதிலும், அது மேலைத்தேய நாடுகளின் அரசியல் தலைவர்களின் நிலைப்பாட்டை அசைப்பதாகத் தெரியவில்லை.

இது காஸாவிலாகட்டும், மேற்குக் கரையிலாகட்டும், சகல பலஸ்தீனர்களும் தம்மைத் தாமே காத்துக் கொள்ள நிர்ப்பந்திக்கப்பட்டு வேறு வழியின்றி தீவிர வன்முறைகளின் பக்கம் வேண்டிய சாத்தியத்தையே உருவாக்கியுள்ளது.

நன்றி வீரகேசரி