பாடசாலை ஆரம்ப உதவித்தொகை! குடும்பங்களுக்கு எவ்வளவு தொகை வழங்கப்படும்?

புத்தகப்பை, உபகரணங்கள், உடைகள்… என பாடசாலை தொடக்கச் செலவுகள் விரைவில் அதிகரிக்கக்கூடும். இதற்காக பிரான்ஸ் அரசு Allocation de rentrée scolaire (ARS) எனும் உதவித்தொகையை ஓகஸ்ட் மாதத்தின் இரண்டாம் பாதியில் வழங்குகிறது. இந்த தொகை, குழந்தைகளின் வயதுக்கு ஏற்ப மாறுபடும். 2025-இல், இந்த உதவித்தொகை சில யூரோக்களால் உயர்த்தப்பட்டுள்ளது.

2025–2026 கல்வியாண்டிற்கான தொகை

2025–2026 கல்வியாண்டு நெருங்கி வரும் நிலையில், பல குடும்பங்கள் ஏற்கனவே கல்வி உபகரணங்களை வாங்கத் தொடங்கியுள்ளனர். பாடசாலை செலவுகளைச் சமாளிக்க உதவுவதற்காக, 6 முதல் 18 வயதிற்குட்பட்ட மாணவர்கள் உள்ள குடும்பங்களுக்கு (வருமான வரம்புகளின் அடிப்படையில்) இந்த ARS வழங்கப்படுகிறது.

ஏப்ரலில் பணவீக்கத்துக்கேற்ப திருத்தப்பட்ட இந்த உதவித் தொகை, வயதின் அடிப்படையில் பின்வருமாறு நிர்ணயிக்கப்பட்டுள்ளது:

6 முதல் 10 வயதுடைய குழந்தைக்கு : 423,48 யூரோக்கள் (2024-இல் 416,40 யூரோக்கள்)

11 முதல் 14 வயது : 446,85 யூரோக்கள் (2024-இல் 439,38 யூரோக்கள்)

15 முதல் 18 வயது : 462,33 யூரோக்கள் (2024-இல் 454,60 யூரோக்கள்)

இந்த தொகைகள் பிரான்ஸ் முழுவதும் ஒரே மாதிரியாக பொருந்தும், ஆனால் Mayotte-இல் சிறிது அதிகம் வழங்கப்படும். தொடக்கப் பாடசாலை மாணவருக்கு 425,60 யூரோக்கள், collège மாணவருக்கு 449,09 யூரோக்கள், lycée மாணவருக்கு 464,65 யூரோக்கள்.

2023 வருமான அடிப்படையிலான நிபந்தனைகள்

அனைத்து பெற்றோர்களும் ARS பெறமாட்டார்கள், ஏனெனில் இது குடும்ப வருமானத்தின் அடிப்படையில் வழங்கப்படும். 2025-ஆம் ஆண்டிற்கான வருமான உச்சவரம்புகள் பின்வருமாறு நிர்ணயிக்கப்பட்டுள்ளன:

ஒரு குழந்தைக்கான வருமான உச்சவரம்பு : 28 444 யூரோக்கள்

இரண்டு குழந்தைகள் : 35 008 யூரோக்கள்

மூன்று குழந்தைகள் : 41 572 யூரோக்கள்

நான்கு குழந்தைகள் : 48 136 யூரோக்கள்

«உங்களின் வருமானம் இந்த உச்சவரம்பை சிறிதளவு மட்டுமே மீறினால், allocation de rentrée scolaire différentielle எனப்படும் கூடுதல் உதவித்தொகைக்கு விண்ணப்பிக்கலாம்» என Service-public தளம் விளக்கியுள்ளது.

எப்போது வழங்கப்படும்?

6 முதல் 15 வயதுக்குட்பட்ட குழந்தைகளுக்கான ARS தானாகவே வழங்கப்படும். 2025 ஆகஸ்ட் 19 செவ்வாய்க்கிழமை முதல் Métropole, Guadeloupe, Guyane, Martinique ஆகிய பகுதிகளில் இது வழங்கப்படும். La Réunion மற்றும் Mayotte பகுதிகளில் ஆகஸ்ட் 5-ம் தேதி முதலே அனுப்பப்பட்டுள்ளது.

இந்த உதவி, நேரடியாக Caisses d’allocations familiales (CAF) அல்லது Mutualité sociale agricole (MSA) மூலம் வழங்கப்படும்.